7 метадаў перамогі над злым духам

Автор: lexo
Опубликовано: 1676 дней назад (19 июня 2013)
Публіцыстычная старонка кс. Андрэя Рылкі

Як абараніцца ад злога духа? Калі нельга варажыць і хадзіць да «бабак», то што рабіць і дзе шукаць ратунку? Гэтыя і падобныя пытанні ставяць многія вернікі, якія раптам адкрылі, што за іх жыццёвымі і сямейнымі праблемамі стаяць рэальныя дэманічныя сілы.

Касцёл напрацягу двух тысячагоддзяў адпрацаваў канкрэтныя і правераныя метады 100%-й абароны ад злога духа і аздараўлення чалавека. Сярод шматлікіх спосабаў абароны звернем увагу на тыя, якія найбольш простыя і даступныя кожнаму жадаючаму.

Шчыры давер да Бога

Першай умовай абароны ад уздзеяння «бабак», магаў ці злых духаў з’яўляецца вера ў Бога і давер толькі Яму. У Дэкалогу (пераліку запаведзяў) Пан Бог ставіць гэтую запаведзь на першае месца. Чалавек, які сапраўды ўсю надзею пакладае ў Богу, перастае баяцца лёсу, чараў, злога духа. Святое Пісанне расказвае, што для веруючай асобы Бог становіцца як скала апоры, надзейны прытулак, верны шчыт і непераможная цвярдыня (пар. Пс 46; 59).

Глыбокі давер да Бога б’е ў самае сэрца планаў дэмана, які робіць усё, каб мы дрыжэлі перад ім і ў веры канцэнтраваліся на ім больш, чым на Богу. Многія экзарцысты звяртаюць увагу на тое, што злы дух «харчуецца» нашымі страхамі. Таму Біблія вучыць, што трэба мець Божы страх і не паддавацца чалавечым страхам.

З гэтага вынікае, што трэба адрэзаць усе каналы, праз якія сатана можа раздмухваць чалавечыя страхі і веру ў магутнасць магіі і злых духаў. У практыцы такім каналам распальвання ў чалавеку страхаў і веры ва ўсемагутнасць сілаў цемры з’яўляецца адмысловая кінаіндустрыя (адпаведная фантастыка, містыка, жахі), спецыяльныя камп’ютарныя гульні, акультныя шоу. Таму хрысціянам варта вучыцца выбіраць, якія фільмы глядзець і ў якія гульні бавіцца.

Пакаянне

Плод жывой веры — пакаянне, адмаўленне ад грахоў і змена жыцця на лепшае. Менавіта пакаянне дае чалавеку магчымасць пачаць карыстацца наймагутнейшымі інструментамі збаўлення — святымі сакрамэнтамі. Сатана ведае пра велізарную сілу, якую ў асобе абуджае пакаянне. Таму ён робіць усё, каб чалавек не захацеў змяніцца і адарвацца ад граху.

Дэман часта карыстаецца «звычайнымі» псіхалагічнымі метадамі: уцягнуць чалавека ў грахі так, каб ён думаў, што ад іх залежыць яго жыццё і шчасце. Злы дух дзейнічае праз самыя разнастайныя страхі, маніпуляцыі эмоцыямі і ўсім тым, што Касцёл залічвае да сямі галоўных грахоў. Таму парваць з грахом — гэта адмовіцца ад зла і даверыцца Богу, нават калі па-людску гэта можа здавацца вар’яцтвам, проігрышам ці чымсьці немагчымым.

Важнай прыкметай сапраўднага пакаяння з’яўляецца не толькі ўнутраная змена жыцця, але і канкрэтныя знешнія дзеянні. Іншымі словамі, разрыў сувязі з сатаной і грахом павінен адбыцца не толькі ў душы, але і ў знешнім асяроддзі пражывання. Практычна гэта азначае, што трэба пазбавіцца ад усіх прадметаў, звязаных з дэманамі: сімвалаў, амулетаў, магічных фігурак, татуіровак, карцінак, фільмаў, тэкстаў. А пасля месца гэтых прадметаў абавязкова трэба запоўніць прадметамі, якія стануць трансліраваць нам Бога (крыж, абразы, асвячоныя прадметы, хрысціянская літаратура і фільмы).

Сакрамэнты

Кожны з сямі святых сакрамэнтаў — гэта наймагутнейшы інструмент супрацьдзеяння злу і развіцця жыцця з Богам. Нездарма Езус пакінуў Касцёлу гэтыя надзвычайныя знакі, праз якія Ён сам дзейнічае ў супольнасці вернікаў. Таму кожнаму хрысціяніну варта пазнаваць, што азначае кожны сакрамэнт і навошта Бог жадае дзейнічаць такім чынам.

Трэба максімальна, наколькі дазваляюць магчымасці, выкарыстоўваць гэтыя Божыя інструменты абароны і збаўлення. У практыцы гэта азначае, што нельга адкладваць на пазней сакрамэнт, калі можна да яго прыступіць цяпер. У сучасным свеце можна заўважыць вельмі хітрую стратэгію сатаны: адвесці людзей ад сакрамэнтаў. Нават нібыта веруючыя людзі часам прыдумваюць смешныя адгаворкі, каб не прымаць хрышчэнне, шлюб, св. Камунію, споведзь і г.д. Чалавек на гэтым заўсёды прайграе, а выграе толькі сатана.

Вернікам, якім здаецца, што сакрамэнты не дзейнічаюць у іх жыцці, варта папрасіць святара аб аднаўленні ласкі кожнага сакрамэнту. У практыцы гэта азначае, то варта нанава пераасэнсаваць значэнне кожнага сакрамэнту і пачаць прымаць яго больш свядома, годна, адкрыцца на тую ласку, якую дае Пан Бог.

Жывая малітва

Пакаянне — гэта не мэта, а толькі сродак. Яго эфектам павінна стаць прабачэнне і паяднанне з Богам, бліжнімі і самім сабой. Многія экзарцысты заўважаюць, што брамай цяжкіх грахоў і каналам злога духа часта становяцца нявырашаныя псіхалагічныя канфлікты, эмацыянальныя раны, зайздрасці, нянавісці, непрабачаныя памылкі і г.д. Многія затоеныя грахі могуць маскіравацца ў глыбінях нашай падсвядомасці цэлымі гадамі.

Па гэтай прычыне веруючыя людзі могуць адчуваць унутраны дыскамфорт, адсутнасць спакою сэрца пры, здавалася б, ідэальным хрысціянскім жыцці. І толькі ў часе глыбокай малітвы аб вызваленні і ўнутраным аздараўленні часта надыходзіць момант адкрыцця: усплываюць схаваныя ў дзяцінстве або маладосці затоеныя непрабачэнні, якія не пераставалі атручваць жыццё і блакавалі дзеянне Божай ласкі. Пладом такой малітвы-адкрыцця павінна быць т.зв. «генеральная» споведзь (з усяго жыцця або з нейкага жыццёвага этапу) і яшчэ мацнейшае паяднанне з Богам, бліжнімі і самім сабой.

Акрамя асабістай малітвы кожны чалавек мае магчымасць звярнуцца па дапамогу да іншых асобаў: людзей і анёлаў. Здаецца, не трэба тлумачыць, якую вялікую моц мае малітва святога чалавека, а наколькі магутнейшую моц мае малітва цэлай групы святых асобаў. Таму Бог стварыў Касцёл як супольнасць людзей, якія адно аднаго могуць падтрымаць у барацьбе за Неба.

У справе абароны ад злога духа шматвяковая практыка Касцёла падказвае, што варта звяртацца ў малітве асабліва да Маці Божай, Міхала Арханёла, Анёла-апекуна, святых заступнікаў. Варта не саромецца прасіць аб малітве не толькі тых, хто ў Небе, але і супольнасць Касцёла на зямлі ці паасобных вернікаў (духоўных і свецкіх). Акрамя гэтага існуюць спецыяльныя малітоўныя набажэнствы, якія маюць велізарную экзарцыстычную моц: св. Ружанец, Вяночак да Божай Міласэрнасці, Крыжовы шлях і т.п.

У справе малітвы экзарцысты таксама заўважаюць, што варта часта звяртацца да Хрыстовых пакутаў, ранаў, крыві. Бо праз Муку Езуса мы былі адкупленыя і быў канчаткова пераможаны злы дух. У малітве варта асцерагацца, каб не ўступаць у кантакт са злым духам праз заклікі, загадванні яму і г.д. Варта маліцца да Бога або клікаць заступніцтва анёлаў і святых. А непасрэдны кантакт са злым духам варта пакінуць спецыялісту (святару, экзарцысту), які ведае, што і як рабіць.

Біблія

Здаецца, сярод вернікаў малаацэненым спосабам абароны ад злога духа і паглыблення жыцця з Богам з’яўляецца Святое Пісанне. Варта штодзённа чытаць Біблію (асабліва Новы Запавет), але не як тэкст, а як адкрыццё, асабістае Божае аб’яўленне, адмысловы спосаб кантакту з Богам праз слуханне і разважанне Яго слова. У Святым Пісанні крыецца велізарная моц вызвалення і асвячэння чалавека.

Таму ад пачатку хрысціянства ў Касцёле сфарміраваліся разнастайныя спосабы малітвы словам Божым. Сярод іх асабліва вядомая Літургія гадзінаў (брэвіярый). Для духавенства яна з’яўляецца абавязковай штодзённай малітвай. Але ў наш час і многія свецкія вернікі актыўна звяртаюцца да гэтага спосабу малітвы па Бібліі. Божае слова мае па-людску неверагодную моц абароны ад злога духа і перамены чалавечага жыцця на лепшае.

Сакрамэнталіі

Магутным інструментам абароны ад злога духа і асвячэння чалавека з’яўляюцца т.зв. сакрамэнталіі. Гэта бласлаўленні і пасвячэнні, якія здзяйсняе святар. У практыцы найбольш распаўсюджаныя сакрамэнталіі — гэта благаслаўленне чалавека, асвячэнне вады, солі, іншых прадметаў ці месцаў. З пункту гледжання абароны ад злога духа велізарную ролю адыгрывае тое, што нейкае месца ці прадметы асаблівым чынам прысвячаюцца Богу, становяцца Яго «тэрыторыяй і ўласнасцю».

З гэтым звязаны просты вывад, што сатана не можа валадарыць над тым, што не яго. Бо злых дух распараджаецца поўнасцю тымі асобамі і рэчамі, якія былі прысвечаныя яму ва ўласнасць. Таму хрысціянін павінен заўсёды пазбаўляцца прадметаў, якія могуць быць уласнасцю дэмана і пашыраць вакол сябе прастору Бога.

У практыцы дзеянне Пана Бога праз сакрамэнталіі выражаецца ў тым, што католікі абавязкова просяць святара пры розных нагодах благаславіць іх дом, важныя прадметы ўжытку (напрыклад, машыны). Са старажытных часоў хрысціяне імкнуцца мець у сябе дома асвячоную або спецыяльна экзарцызмаваную ваду, соль ці алей, якія выкарыстоўваюцца як знакі прыняцця Божага бласлаўлення.

Моцнымі знакамі нашага аддання Богу з’яўляюцца насценныя крыжы і абразы ў пакоях кватэры. А знакам нашага асабістага аддання пад Божую апеку могуць быць такія сакрамэнталіі як нацельныя крыжыкі, шкаплер, медальёны з выявай Хрыста (напрыклад, медальён св. Бэнэдыкта або св. Кацярыны Лябурэ і інш.). Усе гэтыя знакі павінны абавязкова быць прысвечаныя Богу праз святарскае бласлаўленне.

Пры ўжыванні сакрамэнталіяў існуе вялікая небяспека адносіцца да іх як да магічных прадметаў. Варта не забываць, што дзейнічае не сама вада, соль ці абраз, але Пан Бог. Асвячоныя рэчы з’яўляюцца толькі знакамі, якія знешне выражаюць таямніцу Божага дзеяння.

Супольнасць Касцёла

Многія экзарцысты звяртаюць увагу на тое, што велізарную абарончую ролю ў нашым духоўным жыцці адыгрывае кантакт з Касцёлам, з супольнасцю веруючых людзей. Нават звычайная практыка паказвае, што грэх замыкае чалавека, стварае своеасаблівы мур паміж ім і знешнім светам. Калі ў жыццё асобы ўваходзіць злых дух (праз спакусы, грахі, апантанасць), то ён яшчэ болей імкнецца ізаляваць чалавека ад Бога і акружэння. У той самы час дэман вядзе велізарную працу, каб унутры гэтых «закрытых мураў» душы стварыць пекла, паволі разбураючы чалавека духоўна, псіхалагічна, а пасля і фізічна.

Таму найлепшым спосабам супрацьстаяння дэманічнай ізаляцыі, каб не дазволіць сябе знішчыць, з’яўляецца кантакт з супольнасцю Касцёла, дзе асаблівым чынам дзейнічае Пан Бог. Калі чалавек шчыра перажывае пакаянне, то ў яго ўзнікае натуральнае жаданне глыбокага паяднання з Богам і бліжнімі, ён пачынае шукаць Божую супольнасць. Асобу ў такі момант перапаўняе такая велізарная любоў, што ён не можа яе стрымліваць унутры сябе. У такі момант чалавек становіцца па-сапраўднаму нармальным: бязгрэшным, любячым, адкрытым на Бога і бліжняга. Супольнасць такіх людзей мае велізарную тэрапеўтычную моц.

На жаль, сатана ведае, што ў момант пакаяння чалавек шукае Бога і духоўнай супольнасці. Злы дух імкнецца перахапіць душу ствараючы імітацыю святой супольнасці. У выніку ўзнікаюць разнастайныя секты — замкнёныя групы згубленых у духоўных пошуках людзей. Звычайна месца Бога там займае гуру, прарок, лідар або нейкі (злы) дух. Сатана не можа поўнасцю імітаваць Божую супольнасць. Таму ў дэманічным асяроддзі духоўнае замяняецца эмацыянальным, разумная вера — забабонамі, вольнасць дзяцей Божых — таталітарным пакланеннем зомбі.

Цяжка выразіць словамі, на колькі важную ролю адыгрывае кантакт са здаровай хрысціянскай супольнасцю. Касцёл адкрывае перад чалавекам такія перспектывы духоўнага развіцця і творчасці ў адносінах з Богам, што некаторых людзей ажно пужае гэтая свабода і празрыстая мудрасць. Адказная і вольная супольнасць Касцёла — гэта прастора не толькі духоўнага, але і фізічнага кантакту з рэальна прысутным Богам (Эўхарыстыя). Ён тут дзейнічае асаблівым чынам (святыя сакрамэнты, святарства) і прамаўляе з велізарнай моцай (Біблія, малітва).

Фактычна 100% гарантыя забеспячэння поўным наборам інструментаў абароны ад злога духа і аздараўлення чалавека зводзіцца да аднаго месца і супольнасці — Касцёл. Можна быць упэўненым у перамозе толькі тады, калі прабываеш у адзінстве праверанай і разумнай Хрыстовай веры, якая не залежыць ад капрызаў разнастайных гуру і больш слухае Бога, чым людзей. Тым больш, што на гэтым шляху перамогі і вызвалення мы не першыя. Дастаткова зазірнуць у тысячагоддзі каталіцкага шляху і карыстацца досведам мільёнаў нашых папярэднікаў, вера якіх перамагла сатану і прывяла іх да Божага Валадарства.

Кс. Андрэй Рылка
0Голосов: 0
Автор: lexo

Комментарии (0)


Нет комментариев. Ваш будет первым!

Добавить комментарий

Комментарии ВКонтакте

Комментарии Facebook

Все материалы на сайте представлены исключительно для ознакомления и не могут быть использованы в коммерческих целях. Все авторские права принадлежат их владельцам. Если владелец авторских прав не желает, чтобы его произведения были доступны через этот сайт, ему достаточно сообщить нам об этом по электронной почте указанной на странице контактов домена. Расположенные ниже ссылки являются мерами монетизации, и не служат нашей рекомендацией к посещению этих ресурсов. Если вы обнаружили среди них что-то противоречащее общественно-моральным нормам - сообщите нам об этом.

Error. Page cannot be displayed. Please contact your service provider for more details. (9)